8 முஸ்லிம் மாணவிகள் ஆணைக்குழுவில் அடிப்படை உரிமை மீறல் முறைப்பாடு பதிவு
நுவரெலியா புனித சேவியர் கல்லூரியிலிருந்து 2016 ஆம் ஆண்டு க.பொ.த. (உ/த) பரீட்சை விஞ்ஞானப் பிரிவில் பரீட்சை எழுதிய 8 முஸ்லிம் மாணவிகள் தமது பரீட்சைப் பெறுபேறு வெளியிடப்படாது பரீட்சைத் திணைக்களத்தினால் இடை நிறுத்தி வைக்கப்பட்டிருக்கின்றமைக்கு எதிராக அடிப்படை உரிமை மீறல் முறைப்பாட்டினை கடந்த வெள்ளிக்கிழமை கொழும்பு மனித உரிமைகள் ஆணைக்குழுவில் பதிவு செய்தனர்.
மாணவிகளது சார்பில் அவர்களது பெற்றோர் முறைப்பாட்டினைச் சமர்ப்பித்தனர். க.பொ.த. (உ/த) பரீட்சை முடிவுகள் பரீட்சைத் திணைக்களத்தினால் வெளியிடப்பட்டு 14 நாட்களாகியும் தமது பரீட்சை முடிவுகள் இதுவரை வெளியிடப்படவில்லை எனவும் இதனால் தாம் பல்கலைக்கழகத்துக்கு தகுதி பெற்றிருந்தாலும் தமது பல்கலைக்கழக வாய்ப்பு தவறுவதற்கு வாய்ப்பிருக்கிறது. இது அடிப்படை உரிமை மீறல் என அவர்கள் முறைப்பாட்டில் தெரிவிக்கிறார்கள்.
முறைப்பாட்டில் பிரதிவாதிகளாக வலயக் கல்விப் பணிப்பாளர், மாகாணகல்விப் பணிப்பாளர்,பரீட்சைகள் ஆணையாளர் என்போர் பெயர் குறிப்பிடப்பட்டிருக்கிறார்கள்.
நுவரெலியா மாவட்டப் பாடசாலையிலிருந்து பரீட்சை எழுதிய 27 மாணவர்களின் பரீட்சை முடிவுகள் இவ்வாறு தடுத்து நிறுத்தி வைக்கப்பட்டுள்ளது. இவர்களில் 99 வீதத்தினர் முஸ்லிம் மாணவர்களாவர். நுவரெலியா, குருநாகல், புத்தளம், அநுராதபுரம் ஆகிய மாவட்டப் பாடசாலைகளில் பரீட்சை எழுதிய 81 தமிழ் மொழி மூல பரீட்சார்த்திகளின் பரீட்சை முடிவுகள் இடைநிறுத்தி வைக்கப்பட்டுள்ளமை குறிப்பிடத்தக்கது.
இவர்கள் வெளிமாவட்டங்களிலிருந்து வந்து பரீட்சை எழுதியவர்கள் என கூறப்படுகிறது.
கடந்த வெள்ளிக்கிழமை முறைப்பாட்டினை பதிவு செய்வதற்கு வருகை தந்த பெற்றோர் ஒருவர் “விடிவெள்ளி”க்கு கருத்துத் தெரிவிக்கையில் “நான் பதுளை மாவட்டத்தைச் சேர்ந்தவன். பதுளையில் உயிரியல் விஞ்ஞானம் போதிக்க ஆசிரியர் பற்றாக்குறையினால் எனது மகளை நுவரெலியா புனித சேவியர் பாடசாலையில் அனுமதித்து உயர்தரம் படிக்க வைத்தேன். அங்கேயே பரீட்சையும் எழுதினார். ஆனால் பரீட்சை முடிவுகள் தடுத்து நிறுத்தி வைக்கப்பட்டுள்ளது.
இதேவேளை வெளிமாவட்டங்களிலிருந்து வந்து பரீட்சை எழுதிய மாணவர்களின் பரீட்சை முடிவுகள் தடுத்து வைக்கப்பட்டுள்ளது என்று கூறமுடியாது. எனது மகளுடன் பரீட்சை எழுதிய வெளிமாவட்ட மாணவர்களின் பரீட்சை முடிவுகள் வெளியிடப்பட்டுள்ளன.
பரீட்சை முடிவுகள் தடுத்து வைக்கப்பட்டிருப்பதில் எனக்கு சந்தேகம் நிலவுகிறது. தடுத்து வைக்கப்பட்டுள்ள முஸ்லிம் மாணவர்களின் இஸட்ஸ்கோர் அதிகமாக இருக்க வேண்டும். இவர்களது பல்கலைக்கழக அனுமதியைத் தடுப்பதற்காகவே இந்தச் சூழ்ச்சி எனக் கருதுகின்றேன்.
இது தொடர்பாக நாங்கள் பரீட்சை ஆணையாளரைச் சந்தித்தோம். முறையிட்டோம். கல்வி அமைச்சின் செயலாளரது உத்தரவுப்படியே பரீட்சை முடிவுகள் தடுத்து வைக்கப்பட்டிருப்பதாக அவர் கூறினார். எதிர்வரும் பெப்ரவரி மாதம் மாணவர்களை அழைத்து விசாரணை ஒன்று நடத்தவுள்ளதாகவும் தெரிவித்தார்.
பரீட்சை நடந்து 6 மாதங்கள் கடந்துள்ளன. பரீட்சை முடிவுகள் வெளியிடப்பட்டு 14 நாட்கள் ஆகின்றன. இவ்வளவு காலம் கடந்த பின்பு கல்வி அமைச்சுக்கு இவர்கள் வெளிமாவட்ட மாணவர்கள் என தெரியவந்துள்ளதா? இந்த ஏற்பாடு முஸ்லிம் மாணவர்கள் பல்கலைக்கழகம் நுழைவதைத் தடுப்பதாகும். இதற்கெதிராக முஸ்லிம் அரசியல் வாதிகள் குரல்கொடுக்க வேண்டும்” என்றார்.