ad34@hFacMC 
இலங்கை விவகாரம் தொடர்பான ஜெனிவா அறிக்கைக்கு எமது அரசாங்கம் வெற்றிகரமான முறையில் முகங்கொடுக்கும்.தேசிய நல்லிணக்கம் தொடர்பில் சர்வதேச ஒத்துழைப்புடன் விசேட பொறிமுறையொன்றை ஆரம்பிப்போம் என பிரதமர் ரணில் விக்கிரமசிங்க தெரிவித்தார்.
சிறுபான்மை மக்களின் பிரச்சினைகளை கண்டறிந்து அதற்கான உரிய தீர்வினை முன்வைப்பதற்கு தமிழ் தேசியக் கூட்டமைப்பு மற்றும் முஸ்லிம் கட்சிகளுடன் ஒன்றிணைந்து செயற்பட்டு நாட்டை முன்நகர்த்தி செல்வோம் என்றும் அவர் குறிப்பிட்டார்.
என்னை தோற்கடிப்பதற்கு 2005 இல் பிரபாகரனுடன் மஹிந்த ராஜபக் ஷ உடன் படிக்கை செய்து கொண்டமையின் ஊடாக தேசிய பாதுகாப்புக்கு பாதிப்பு ஏற்படாவிடின் ,என்னுடைய நல்லிணக்க செயற்பாடுகள் மாத்திரம் எவ்வாறு தேசிய பாதுகாப்புக்கு அச்சுறுத்தலாக மாறும்? என்றும் பிரதமர் கேள்வி எழுப்பினார்.
கொழும்பு சினமன் கிரான்ட் ஹோட்டலில் நேற்று இடம்பெற்ற வர்த்தக மாநாட்டில் கலந்து கொண்டு உரையாற்றும் போதே பிரதமர் மேற்கண்டவாறு தெரிவித்தார்.
அங்கு அவர் மேலும் உரையாற்றுகையில்,
நாட்டை கட்டியெழுப்புவதற்கு சிறுபான்மை மக்களின் அடிப்படை பிரச்சினைகள் தீர்ப்பது மிகவும் அவசியமாகும். நல்லிணக்கத்தையும் ஐக்கியத்தையும் கொண்டு நாட்டை வளர்ச்சிக்குட்படுத்துவதே எமது குறிக்கோளாகும். இந்த பிரச்சினையை மேலும் பெரிதுப்படுத்துவதற்கு நாம் தயாரில்லை.
நாட்டின் முப்பது வருடகால யுத்தம் நிறைவடைந்துள்ளது. சிறுப்பான்மை மக்களின் நலன்கள் தொடர்பில் நாம் ஆராயவேண்டியுள்ளது. தேசிய பிரச்சினை தீர்வு விடயத்தில் தென்னாபிரிக்காவின் நியமிக்கப்பட்ட நல்லிணக்க ஆணைக்குழுவை நாம் நியமிப்போம். மேலும் தீர்வு விடயத்தில் சர்வதேச ஒத்துழைப்புடன் நாம் செயற்படவுள்ளோம். இதற்கான ஆலோசனைகளை நாம் சர்வதேச நாடுகளிலிருந்து கோரவுள்ளோம்.
எனினும் நாட்டை காட்டிக்கொடுக்கும் வகையில் சர்வதேசத்தை இந்த பிரச்சினையில் தலையிடவைத்தது மஹிந்த ராஜபகஷவாகும். சர்வதேச விசாரணைக்கு முழுமையான பொறுப்பை மஹிந்த ராஜபக்ஷவே ஏற்கவேண்டும். நாட்டில் உள்ளக பொறிமுறையொன்றை ஆரம்பிப்பதாக ஐக்கிய நாடுகள் சபையின் செயலாளர் நாயகம் பான் கீ மூனிடம் வாக்குறுதி அளித்து அதனை மீறி செயற்பட்டமையினாலேயே சர்வதேச அழுத்தங்கள் இலங்கைக்கு எதிராக திரும்புவதற்கு பிரதான காரணமாகும்.
மேலும் செப்டம்பர் மாதம் அளவில் இலங்கை தொடர்பில் ஜெனிவா குழுவின் அறிக்கை வெ ளியிடப்படவுள்ளது. இது எமக்கு புதியதொன்றல்ல பல தடவை குறித்த அறிக்கை ஐக்கிய நாடுகள் மனித உரிமை பேரவையில் சமர்ப்பிக்கப்பட்டுள்ளது. எனினும் குறித்த அறிக்கை தொடர்பில் முன்னைய அரசின் வெளிவிவகார அமைச்சர் ஜீ.எல்.பீரிஸ் எவ்வாறு செயற்பட்டார் என்பது எமக்கு தெரியாது. இருந்த போதிலும் இந்த அறிக்கைக்கு ஐக்கிய தேசியக் கட்சியின் அரசாங்கம் வெற்றிகரமாக முகங்கொடுக்கும்.
ஆகவே நாட்டின் நல்லிணக்கத்தை முன்னகர்த்துவதே எமது அரசியலின் பிரதான ் திட்டமாக உள்ளது. மேலும் சிறுப்பான்மை மக்களின் தீர்வு விடயத்தில் தமிழ் தேசியக் கூட்டமைப்பு மற்றும் முஸ்லிம் கட்சிகளின் ஒத்துழைப்பை கொண்டு தீர்வு காண திட்டமிட்டுள்ளோம்.
பிரச்சினைகளுடன் எம்மால் நாட்டை கட்டியெழுப்ப முடியாது. இன ரீதியான பிரச்சினைக்கு நாம் முடிவுக் கட்டி நல்லிணக்கம் மற்றும் இன மதங்களுக்கிடையிலான ஒற்றுமை விடயத்தில் நாட்டை முன்நகர்த்த வேண்டியுள்ளது.
மேலும் தற்போது தேசிய நல்லிணக்கத்திற்கு பாதிப்பு ஏற்பட்டுள்ளதாக குற்றம் சுமத்தி வருகின்றனர். நாட்டின் தேசிய பாதுகாப்பிற்கு எந்தவொரு பாதிப்பும் ஏற்பட இடமளிக்க போவதில்லை. 2005 ஆம் ஆண்டு நடைப்பெற்ற ஜனாதிபதி தேர்தலின் போது என்னை தோற்கடிப்பதற்காக விடுதலை புலிகளின் தலைவர் வேலுப்பிள்ளை பிரபாகரனுடன் உடன்படிக்கை கைச்சாத்திட்டு என்னை தோற்கடித்தமை தேசியப்பாதுகாப்பிற்கு அச்சுறுத்தலாக அமையாவிடின் , நாட்டின் நலனை கருத்திற் கொண்டு நல்லிணக்க செயற்பாடுகளை
முன்னெடுத்து செல்வதனால் மாத்திரம் எவ்வாறு தேசிய பாதுகாப்புக்கு அச்சுறுத்தல் ஏற்படும்.அது மாத்திரமின்றி கே.பி என்ற குமரன் பத்மநாதனை நாட்டிற்கு அழைத்து வந்துள்ளமை தேசிய பாதுகாப்பிற்கு அச்சுறுத்தலாக அமையதா என்று வினவுகின்றோம்.ஆகவே நாட்டின் அபிவிருத்தியை மையமாக கொண்டு பொருளாதாரத்தை நான் கட்டியெழுப்புவேன். அதிக முதலீடுகளை நாட்டிற்கு வரவழைத்து காட்டுவேன். பொருளாதார ரீதியாக அனைத்து துறைகளையும் அபிவிருத்தி செய்து சர்வதேச சந்தைக்கு இலங்கையை கொண்டு செல்வேன்.